შიო-მღვიმის მონასტერი
(ტექსტი აღებულია წიგნიდან: საქართველოს ისტორიისა და კულტურის ძეგლთა აღწერილობა, თბ., 1990, ტ.5, გვ. 318-325)
მონასტერი მდებარეობს თბილისიდან 30 კმ-ზე, ქალაქ მცხეთის დასავლეთით 9-10 კმ-ზე, მდინარე მტკვრის მარცხენა ნაპირზე.
კომპლექსში შედის ჩრდილოეთიდან სამხრეთისკენ ტერასებად განლაგებული სხვადასხვა დროისა და დანიშნულების ნაგებობანი: მღვიმე-ეკლესია(შიოს თავდაპირველი სამყოფელი) იოანე ნათლისმცემლის VI საუკუნის ჯვარგუმბათოვანი ეკლესია სხვადასხვა დროის მინაშენებით, სამრეკლო, შიოს სასაფლაო-ეკლესია, ღვთისმშობლის მიძინების ტაძარი კოშკით, სატრაპეზო, კლდეში ნაკვეთი მღვიმეები - ქვაბები, ბერთა საცხოვრებელი ნაგებობები, წყარო, წყალსადენი, გალავანი, ჯვრის ამაღლების ეკლესია.
მონასტრის დამაარსებელია შიო, მღვიმელად წოდებული, ერთი იმ ’’ათცამეტ ასურელ მამათაგანი’’, რომლებიც VI საუკუნეში საქართველოში ქრისტიანობის განმტკიცებისათვის იღვწოდნენ.